من الذي ينشيء العادات والتقاليد ؟؟؟

هل مر عليكم انسان لم يتضجر من العادات والتقاليد ؟!

انا عن نفسي : لا

وبما اني انا كاتب الموضوع وبما اني اشوف انه مامر علي انسان لم يتضجر من العادات والتقاليد فابعتبر انه كلكم تقولون لا

نجي للجد ..

الحين هل الاجيال اللي سبقتنا كانوا يشتكون من العادات والتقاليد ؟؟

ام نحن فقط من يعاني منها ..

واذا كانوا يشتكون واللي قبلهم يشتكون واللي قبلهم يشتكون اجل من وين جات ؟!

واذا كانوا مايشتكون هم مرتاحين بكيفهم .. لكن ليه حنا نسوي الشي اللي تعودوا انهم يسوونه وحنا محنا مرتاحين له ؟!

وبعدين اكيد ان للعادة هذي اصل ..

وش اللي يمنع اننا نكون اصل لعادة جديدة ؟!

ليه مايكون جيلنا مثل الجيل اللي تمت بواسطته انشاء هذه العادات اللي جالسين تشوفونها اليوم ..

بعدين وش هالاسم ( تقاليد ) .. ترى تقاليد هي جمع لكلمة تقليد .. والتقليد ترى في السوق مايجيب ولا ريال فليش نحتفض باشياء رخيصة ونتمسك فيها

رسالة الى اصدقائي المتضررين من عادات اجداد اجدادهم : ترى اجداد اجدادكم ماكان عندهم هالفلة والوناسة اللي عايشين فيها فكانوا يتمسكون باشياء من باب الاكشن والوناسة ويخترعون عادات مادري وش تبي ..
لكن بما انه صار عندنا بلاك بيري واي فون 4 والشركات صار فيها شي اسمه wms يخليك تتحكم بالشركة وانت في البيت فما اعتقد انه فيه داعي اننا نعيش على نفس المباديء اللي تعودوا انهم يعيشون عليها .. هم تعودوا وصارت عادة حنا حاولنا نتعود ماقدرنا اذا من حقنا نتعود على الشي اللي احنا نبي نتعود عليه : )

يالله شدوا حيلكم وكل واحد يصنع له عادة جديدة ..

بس اتمنى انكم تبتعدون عن صناعه عادات وتقاليد مادري وش تبي يعني لا يدخل الواحد في عزى وهو ماسك البلاك بيري ويقول هذي عادتي وتقاليدي الخاصة وفهد دوت كوم هو اللي قال لنا نصنع عادات وتقاليد جديدة .. لا ياحبيبي انا ماقلت لك اصنع عادات وتقاليد بهالطريقة البشعه .. انما اصنع عادات وتقاليد معقولة وتعكس صورة مهذبة ومحترمة عنك

وسلامتكم ..